Na tarde de onte, o Presidente da Deputación da Coruña, Valentín González Formoso, e o Deputado responsable da área de Emprego, José Ramón Rioboo, mantiveron una videoconferencia cos coworkers do Pazo de Arenaza, na que se interesaron polo estado dos seus proxectos e polas consecuencias que a crise do COVID19 tivo nos mesmos.
Ao longo do encontro virtual, os emprendedores amosaron a súa satisfacción polo feito de que poidan retomar a actividade profesional e empresarial nesta instalación. Neste senso, WeKCo, a empresa encargada do servizo de xestión do espazo, e os servizos de prevención e saúde laboral da Deputación traballaron conxuntamente para definir o protocolo a seguir nas intalacións para asegurar a seguridade dos usuarios de Arenaza respecto do COVID-19.
Tras dous meses de actividade exlusivamente online, o coworking Pazo de Arenaza é a primeira instalación da Deputación Provincial da Coruña que inicia a “nova normalidade” a partir de hoxe. Dadas as condicións particulares dos coworkers, a reincorporación dos mesmos será escalada e as visitas externas estarán moi limitadas e condicionadas ao cumprimento do protocolo desenvolvido. Os eventos presenciais terán que agardar un tempo, pero están programados para os próximos días varios eventos en directo en formato webinar ou masterclass.