Se es emprendedor/a, é fundamental que fagas uso das redes sociais, tanto para darte a coñecer como para estar en contacto con clientes ou atraelos. Podes pensar que no teu caso non son necesarias ou que non tes tempo para xestionalas, pero a verdade é que as redes sociais son unha forma de gañar visibilidade, en moitos casos practicamente gratuíta. Aínda así, ollo, se finalmente te decides a ter presenza no social media non todo vale, é imprescindible que teñas claras unhas cantas cousas:
- Non todas as redes funcionan do mesmo xeito para as empresas do teu eido.
- As redes teñen diferentes usos dependendo dos obxectivos marcados.
- Cada rede ten diferentes posibilidades, cos seus pros e os seus contras.
- O presuposto pode influír no éxito das túas redes.

As estratexias nas Redes Sociais

A construción da túa marca

O proceso de branding é un paso fundamental do teu negocio nas redes, pois será o que lle outorgue uns valores e personalidade únicos, eses intanxibles que son decisivos á hora de escoller opcións.
O branding funciona en dúas partes. Por un lado, a imaxe tanxible, conformada polo nome, o logotipo...; e logo, pola outra banda, eses valores intanxibles que se transmiten, o que queres que pensen de ti.

Apelando ás emocións

Algo que non podemos negar é que confiamos máis nas empresas que se humanizan. A que non lle gusta ver fotos do equipo detrás de determinado negocio? Ou escoitar como foi o proceso de creación dunha empresa por parte dos seus protagonistas?
Ao  humanizar a marca, os clientes poden ver ás persoas que estás tras dela. Isto conséguese contando historias, calquera que poida aportar interese ou valor nos teus clientes e lles permitan identificarse contigo.

Creando valor

Non só tes que dedicar tempo a traballar nos contidos que teñan valor para o teu cliente, tamén tes que invertilo na súa propia figura. Isto é un esforzo que falará ben da túa marca ao ver que te preocupas e coidas deses seguidores/as, o que fará posible construír unha comunidade arredor da marca cuns clientes fieis.
As redes sociais son unha boa forma de saber que pensa o teu público de ti, polo que podes comezar a crear unha relación con el con pequenas contribucións relevantes e útiles: consellos, suxestións, información interesante e, incluso, pedindo opinións e valoracións.

Cales son as redes estrela?

Como ben dixemos antes, escoller as redes sociais nas que vas estar presente depende de moitos factores a analizar, pero é ben certo que o big five confórmano Facebook, Instagram, Twitter, Linkedin e Youtube. As tres primeiras serán definidas como redes sociais xenerais e as dúas últimas como temáticas, pois teñen unhas finalidades concretas.

Facebook

É unha rede complicada de xestionar porque admite moitos tipos de contidos, pero non todo vale. Debes proporcionar cousas interesantes que enganchen ao teu público e, así, ser capaz de redirixir tráfico á túa web. O formato que máis está destacando é o vídeo, xa que, a pesar de requirir máis tempo pola súa gravación e edición, aumenta a visibilidade; estas pezas poden ser titorías, clips de partes relevantes do teu traballo, consellos... As posibilidades son ilimitadas e só tes que botarlle imaxinación!
Facebook admite unha ou dúas publicacións ao día, pero debes combinar formatos distintos (vídeos, fotos, enlaces...), priorizando a calidade á cantidade: é mellor que publiques menos e ofrezas contido de valor que saturar ao público con nimiedades.
Ademais, debes escoller ben cando publicar. Esta rede funciona mellor pola semana, pero terás que adaptarte aos teus clientes/as, para o cal podes empregar as estatísticas que a propia rede che proporciona ou axudarte dalgunha ferramenta externa.

Instagram

Esta é a rede perfecta para humanizar a túa empresa. Tes que escoller fotos coidadas e estéticas para publicar, non serve calquera imaxe, os detalles son os que dotan de valor a este recurso. Os vídeos aquí non funcionan tan ben como en Facebook, pero si destacan os stories, que deberían aparecer diariamente e os cales admiten todo tipo de formatos. Estas historias teñen a función de transmitir naturalidade e podes empregar, incluso, contidos nos que persoas externas che nomeen.
Os vídeos en directo tamén son unha opción interesante, xa que denotan proximidade cos teus seguidores/as e son perfectos para sesións de preguntas, píldoras formativas, etc.
Esta rede social é, quizais, máis lúdica que as outras nomeadas, o que deberás ter en conta na programación das túas publicacións. O ideal sería actualizar unha vez ao día, entre tres e cinco veces á semana (con stories tamén diarios) e utilizando etiquetas. No caso destas, non te pases coa cantidade e tenta que sexan personalizadas en base ao contido publicado.

Twitter

É unha rede xenial para estar ao tanto de todo o que está pasando. Interésache moito seguir perfís que sexan atractivos para ti, que poidan proporcionarche material de valor.
Podes empregar a rede para publicar noticias e outras novidades da túa contorna e, aínda que os tuits acompañados de contido audiovisual funcionan moi ben, non te esquezas de publicar algún que só teña texto: poden ser informacións concretas, preguntas, opinións ou algo para xerar debates. En todo caso, a interacción é moi importante en Twitter, esfórzate en responder e recomendar contidos que che sexan interesantes.
Tenta publicar tuits orixinais e que teñan valor para as persoas que che seguen, emprega hashtags e tuitea, polo menos, unha vez ao día.

Linkedin

A rede profesional por excelencia, non só é ideal para promover contidos, senón tamén para conectar con xente que pode resultarche interesante e conseguir recomendacións, polo cal é imprescindible para o networking. Aquí non vale publicar contidos ociosos, debes compartir aqueles que che axuden a crear, posicionar e coidar a túa imaxe de marca. É importante que sexan orixinais (a Linkedin non lle gustan moito os enlaces externos) e, se podes, anímate a escribir algún artigo. Tamén poderías acompañar con recursos audiovisuais e recorda engadir sempre hashtags,
A interacción nesta rede é fundamental, comenta e comparte publicacións doutros/as colegas. En cambio, non é tan importante publicar constantemente, chegará con 3-4 veces á semana, sempre en horario de mañá e evitando os fins de semana. Ademais, debes ter coidado o teu perfil e actualizado na medida do posible.

Youtube

Se te decidiches a crear contidos audiovisuais, Youtube é a principal plataforma para vídeos. Aínda que sexa algo tedioso iso de gravar e editar, os vídeos funcionan moi ben e deberías publicar, polo menos, unha vez á semana. Poderás enlazalos co resto de redes sociais para xerar máis visitas e empregalos noutros soportes como presentacións, blogs, newsletters...
Os vídeos admiten moitos tipos de contidos e poden xerar moita interacción, ademais de rebotar público á túa páxina web.

Boas prácticas nas Redes Sociais

Aquí che deixamos unha serie de recomendacións para aproveitar ao máximo as redes sociais:
1. Segue unha planificación (o que che axudará a aforrar tempo e non saturarte) e mantén as redes sociais actualizadas.
2. A calidade antes que a cantidade, prioriza os contidos que sexan valiosos e non publiques "por publicar".
3. Non repitas os mesmos contidos en todas as redes, cada unha ten os seus propios obxectivos e unhas características diferentes.
4. Coida a túa linguaxe, o ton e vixía os erros ortográficos.
5. Inclúe preguntas nas túas publicacións para fomentar a participación entre os teus seguidores e seguidoras.
6. Colabora, se podes e che apetece, con influencers ou outros emprendedores/as que poidan ter máis alcance ca ti.

Esperamos que este artigo che sexa de axuda na túa aventura polo Social Media!
Se queres estar ao tanto de todo o que vai pasando no pazo, presta atención a este blog, ás nosas redes sociais e á nosa páxina web. Moi pronto volveremos con máis novidades!

Entradas relacionadas

0 Comentario(s)